🏠 Portal 🔍 Proofreading Workbench 📘 Bilingual Edition 📄 Markdown
اِسْـلَامِی حُـکُـوْمَـت
Islami Hukumat: The Islamic State, Governance & Caliphate
شمس المفسرین بحر العلوم حضرت محمد عبد القدیر صدیقی قادری حسرت رحمۃ اللہ علیہ
Ḥaḍrat Muḥammad ‘Abd al-Qadīr Ṣiddīqī Qādrī ‘Ḥasrat’ (Baḥr al-‘Ulūm)
سلسلہ اشاعت: حسرت اکیڈیمی پبلیکیشنز، صدیق گلشن، بیرون فتح دروازہ، حیدرآباد دکن · اشاعتِ حسرت اکیڈیمی / Hasrat Academy Publications (1381 AH / 1961 CE)
بِسْمِ اللَّهِ الرَّحْمَٰنِ الرَّحِيمِ
آیت [سورۃ الأنعام / یوسف 6:57 / 12:40:57]
إِنِ الْحُكْمُ إِلَّا لِلَّهِ

حکم دینا تو خدا ہی کا کام ہے۔

آیت [سورۃ النساء 4:59]
يَا أَيُّهَا الَّذِينَ آمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ

اے ایمان والو! اللہ کی طاعت کرو اور رسول اور اپنے حاکموں کی بھی اطاعت کرو۔

اِسْـلَامِی حُـکُـوْمَـت

از: بحر العلوم حضرت مولانا محمد عبد القدیر صدیقی حسرت حیدرآبادی رحمۃ اللہ علیہ (صدر شعبہ دینیات جامعہ عثمانیہ حیدر آباد دکن)

سلسلہ اشاعت: حسرت اکیڈمی ۲۶۲، صدیق گلشن، بیرون فتح دروازہ حیدر آباد دکن۔ جمادی الاخریٰ ۱۳۸۱ھ۔ تعداد: (۵۰۰)۔ قیمت: (۳۵) پیسے۔

بِسْمِ اللَّهِ الرَّحْمَٰنِ الرَّحِيمِ
اسلامی حکومت

کیا اسلامی حکومت شخصی ہے یا جمہوری؟ اسلامی حکومت ہونے کا دار و مدار کس چیز پر ہے؟ کیا اسلامی حکومت کے لئے اس کے ارکان کا بے گناہ ہونا شرط ہے؟ مجتہدین کی کتنی قسمیں ہیں؟ کیا اب کوئی مجتہد پیدا نہیں ہو سکتا؟ کیا ہر زمانے میں کسی نہ کسی مجتہد کا ہونا ضروری ہے؟

ہم اسلامی حکومت کی تعریف کرنے سے پہلے اسلام کی تعریف کریں گے۔ اسلام میں اول ظاہری ارکان نماز، روزہ، حج اور زکوٰۃ ادا کرنا ہے۔ اگر بغیر یقین اور ایمان کے ہے تو وہ منافقوں کا ایمان ہے، وہ نجات کے لئے کافی نہیں۔ دوسرا یہی اعمال یقین اور ایمان کے ساتھ ہوں تو یہ اسلام سچا اور نجات کے لئے کافی ہے۔ پس ایمان کا زور دل پر ہے اور اسلام کا زور اعمال پر، لہٰذا تین صورتیں پیدا ہوئیں:

پہلی صورت یہ کہ پورا پکا مسلمان جو ایمان کے ساتھ عملِ صالح بھی رکھتا ہے۔ دوسری صورت اسلام اور اعمال تو ہیں مگر یقین و ایمان نہیں، ایسا اسلام کام نہیں آتا۔ یہ اسلام منافقوں کا ہے:

آیت [سورۃ الحجرات 49:14]
قُولُوا أَسْلَمْنَا وَلَمَّا يَدْخُلِ الْإِيمَانُ فِي قُلُوبِكُمْ

(تم کہو ہم مسلمان ہو گئے، حالانکہ ابھی ایمان تمھارے دلوں میں داخل نہیں ہوا)۔ تیسری صورت ایک شخص ایمان تو رکھتا تھا لیکن دوسروں سے اس کو چھپاتا تھا، یا ایمان لاتے ہی مر گیا اعمالِ صالحہ کرنے کا موقع ہی نہیں ملا:

آیت [سورۃ غافر 40:28]
وَقَالَ رَجُلٌ مُّؤْمِنٌ مِّنْ آلِ فِرْعَوْنَ يَكْتُمُ إِيمَانَهُ

(اور فرعون کے لوگوں میں سے ایک ایمان دار مرد نے کہا جو اپنا ایمان چھپاتا ہے)۔

صاحبو! اعمالِ صالحہ کیا جزوِ ایمان ہیں یا نہیں؟ اس میں ہمارا، خوارج، معتزلیوں کا اختلاف ہے۔ ہمارے پاس مومن گناہ کرنے سے کافر نہیں ہو جاتا۔ خوارج کے پاس گناہ کرتے ہی کافر ہو جاتا ہے۔ وہ اعمال کو جزوِ ایمان سمجھتے ہیں اور ان کے فوت ہونے سے ایمان کے فوت ہونے کو لازم سمجھتے ہیں۔ معتزلی بھی اعمال کو جزوِ ایمان سمجھتے ہیں مگر عمل کے فوت ہونے کو ایمان کا فوت ہونا لازم نہیں سمجھتے۔ ان کے پاس ایسا شخص نہ مومن ہے نہ کافر۔ ہمارے پاس عمل کے فوت ہونے سے مومن ایمان سے نہیں نکل جاتا۔ اللہ تعالٰی فرماتا ہے:

آیت [سورۃ الحجرات 49:9]
وَإِنْ طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا

(اگر دو فریق مسلمانوں کے آپس میں کشت و خون کریں تو ان میں صلح کرا دو)۔ دیکھو باہمی جنگ و قتال کرنے کی وجہ سے وہ ایمان سے نہیں نکل گئے، ان کو اللہ تعالیٰ نے «طَائِفَتَيْنِ مِنَ الْمُؤْمِنِينَ» یعنے مومنین کے دو گروہ فرمایا۔ مگر یہ بھی یاد رکھو کہ جس کو اپنے

مومن اور مسلمان ہونے کا یقین نہیں وہ نہ مومن ہے نہ مسلم۔ ایمان اور اسلام کے ساتھ یقین کا رہنا شرطِ اولین ہے، بغیر یقین کے نہ ایمان قابلِ قبول ہے نہ اسلام۔

ہم اصل مباحث پر گفتگو کرنے سے پہلے چند مقدمات بیان کرتے ہیں۔ امید ہے کہ ان کے سمجھنے سے اصل مسائل کے سمجھنے میں سہولت پیدا ہو گی۔ ہم بعض لوگوں کو شاہانہ عمامہ، کرتا، پاجامہ، صدری، نعلین پہنے ہوئے دیکھتے ہیں اور بعض کو ٹوپی، قمیض، کوٹ، پاجامہ یا نیکر اور بوٹ پہنے ہوئے، اور بعض کو ایسا بھی دیکھتے ہیں کہ سر پر ٹوپی ہے نہ عمامہ، بعض صرف قمیض اور نیکر پہنتے ہیں۔ بچے دوڑتے ہیں تو صرف نیکر پہنے ہوئے یا نیکر اور نیم آستین یا ہاف آرم پہنے ہوئے، بعض پہلوان کشتی کے وقت صرف چڈی یا جانگیا پہنتے ہیں، ان میں سے کسی کو ننگا نہیں کہا جاتا۔ اگر کوئی شخص تمام کپڑے پہنے اور ایک پاجامہ نہ پہنے، وہ بے شک ننگا ہے۔ وہ شرفاء کی محفل میں شریک ہونے کے قابل نہیں۔ اس سے کیا معلوم ہوا کہ کپڑے رکھنے میں بھی تفاوت ہے۔ اسی طرح جو اصولِ دین و قرآن و حدیث سے انکار کرتا ہے وہ بے شک ننگا ہے، دین سے عاری ہے۔

صاحبو! قانون داں لوگ بھی دو قسم کے ہیں، بعض مقنن ہیں قانون بناتے ہیں، بعض مقنن تو نہیں ہیں مگر قوانین کو سمجھتے اور ان پر خود بھی کاربند ہوتے اور دوسروں کو بھی اس کی

تعلیم دیتے ہیں اور اس کی متابعت میں چلنے کا حکم دیتے ہیں۔ یہ بھی یاد رکھو ایک کلی قانون ہوتا ہے اور ایک واقعات ہوتے ہیں۔ قانون کے دفعات کو واقعات پر منطبق کرنے میں رائے کی ضرورت ہوتی ہے۔ قانون بنانا مقنن کا کام ہے اور قانون کو واقعات پر منطبق کرنا حاکم، جج اور مجسٹریٹ کا کام ہے۔ رائے کے اختلاف سے اصل قانون کا خلاف لازم نہیں آتا۔

یہ بھی یاد رکھو: ایک حکومت کا امتیاز دوسری حکومت سے بلحاظِ اقتدارِ اعلیٰ کے ہے۔ دو حکومتوں کے اقتدارِ اعلیٰ جدا ہیں تو وہ جدا حکومتیں ہیں۔ اگر سب کا اقتدارِ اعلیٰ ایک ہی ہے اور قانون ایک ہے تو وہ ایک ہی حکومت ہے۔

صاحبو! زمانۂ خلافتِ راشدہ میں حکومت کے ارکان سب اچھے تھے تو وہ خلافت تھی۔ اور بعد کے زمانے میں بعض احکام میں مخالفت پیدا ہو گئی۔ بعض احکامِ شرع پر بعض کاموں میں پابند نہ تھے۔ چونکہ زمانۂ خلافتِ راشدہ میں شرعِ شریف پر پورے طور سے عمل ہوتا تھا اس واسطے ان کی مثال پورے کپڑے پہنے ہوئے کی ہے اور بعض حکومتوں میں شرعِ شریف کی پوری پابندی نہ تھی ان کی مثال ان لوگوں کی ہے جو پورے کپڑے پہنے ہوئے نہیں ہیں، مگر چونکہ اسلامی حکومت میں کوئی قرآن و حدیث سے انکار نہیں کرتا تھا، ان پر ننگے کا لفظ صادق نہیں آتا اور نہ ان کو غیر اسلامی حکومت کہتے ہیں۔

صاحبو! رسول اللہ صلی اللہ علیہ وسلم کے زمانے میں منافق بھی تھے، ذمی غیر مسلم بھی تھے، مگر رحمۃ للعالمین نے ان منافقوں کو بھی حکومتِ اسلامی سے خارج نہیں فرمایا۔ میں تو شروع سے اب تک اسلامی حکومتوں کا قائل ہوں اور کسی کو دائرۂ اسلام سے خارج نہیں سمجھتا۔

جنابِ من! اسلامی حکومت شخصی ہے یا جمہوری؟ اسلام کا نظام دوسرے نظاموں سے بالکل جدا ہے۔ اسلام میں «إِنِ الْحُكْمُ إِلَّا لِلَّهِ» ہے۔ اور خدائے تعالیٰ واحد، احد اور مشخص و معین ہے۔ اس حیثیت سے اسلامی حکومت کو شخصی کہنا چاہتے ہو تو کہو، اور ﴿وَشَاوِرْهُمْ فِي الْأَمْرِ﴾ (اور ان سے کام میں مشورہ لیجئے) اور ﴿وَأَمْرُهُمْ شُورَىٰ بَيْنَهُمْ﴾ (اور کام کرتے ہیں آپس کے مشورہ سے) [پ شوریٰ ع ۴] بھی ہے، لہٰذا اگر تم اس کو جمہوری کہنا چاہتے ہو تو کہہ سکتے ہو۔ مشورے غیر منصوص احکام میں ہوتے ہیں، منصوص کے سامنے چوں و چرا کی گنجائش نہیں۔

صاحبو! نظامِ اسلام اس طرح قائم ہوتا ہے: ماہرین علماء، فقہاء، مجتہدین قرآن و حدیث کو دیکھتے ہیں اور ان سے احکام استنباط کرتے ہیں۔ پھر ان مجتہدین کے اجتہاد کئے ہوئے احکام کو اسلامی سلطنتوں کے قاضی واقعات پر منطبق کر کے احکام دیتے ہیں۔ یہ قاضی کیا تھے؟ حاکمِ عدالت جج اور حاکمِ فوجداری مجسٹریٹ کا کام کرتے تھے۔

صاحبو! امام ابو حنیفہ، امام ابو یوسف، امام محمد بن حسن، امام شافعی، امام مالک، امام احمد بن حنبل اور دوسرے ائمہ بھی تھے۔ چونکہ جب تک اسلامی حکومت ایک رہی اور بادشاہ ایک رہا تو وہ خود اپنے اجتہاد پر دوسروں کو چلاتا تھا اور دوسرے لوگ رفعِ بدامنی کے لحاظ سے اس کی رائے کے خلاف نہیں کرتے تھے۔ جب اسلامی سلطنت مختلف مقامات میں منقسم ہو گئی تو لوگ کہیں شافعی مذہب کے پابند ہو گئے، کہیں مالکی مذہب کے اور کہیں حنفی مذہب کے۔ ہر جگہ بادشاہ اپنے مقرر کردہ قاضی کے احکام کو جاری کرتا اور دوسرے اس کی اطاعت کرتے کہ کہیں بدامنی نہ ہو جائے۔ یاد رکھو، امن کا برقرار رکھنا نہایت اہم چیز ہے۔

صاحبو! یہ بھی یاد رکھو کہ حضرت امام ابو حنیفہ (امامِ اعظم) کا خلاف حضرت امام ابو یوسف صاحب نے کیا، اس واسطے کہ اس زمانے کے اقتضاء کے مطابق تھا۔ امام ابو یوسف کا خلاف امام محمد ابن حسن نے کیا، کیونکہ اس وقت حالات بدل گئے تھے۔ ہر زمانے کے لوگ ان صاحبوں میں سے جن کے فتوے کے مطابق زمانہ تھا، اس کے حالات تھے، اس پر فتویٰ دیتے۔ یہ بھی یاد رکھو، زمانہ بدلتا جا رہا ہے، مختلف ضرورتیں پیدا ہوتی جا رہی ہیں، اس واسطے ہر زمانہ میں مسلمان سر جوڑ کر بیٹھیں اور اپنے زمانے کی ضرورتوں کے لئے قرآن و حدیث اور اقوالِ ائمہ سے استنباط کر کے احکام جاری کریں۔

صاحبو! آج کل بعض یورپی افراد کو ائمہ رضوان اللہ علیہم سے

بڑھ کر سمجھنے لگے ہیں۔ ان کے کان میں مذہبی تعلیمات پڑی ہی نہیں، جب دیکھا یورپین افراد کے اقوال کو دیکھا، اپنے گھر کی تعلیم سے ناواقف، دینی معلومات سے خالی: «خانہ خالی را دیو می گیرد»۔ اے انگریزی داں حضرات! تم دینی تعلیم سے جی چراتے ہو اور اس کو اس زمانے کے لائق نہیں سمجھتے، مگر کچھ تم کو یہ بھی خبر ہے کہ اب یورپین اور امریکن سب اپنے تمدن اور طرزِ زندگی سے بیزار ہو چکے ہیں؟ تم اپنا ہادی ان یورپی اقوام کو سمجھتے ہو، اور یورپی اقوام کو پناہ ملتی ہے تو اسلامی تعلیمات میں! جرمنی میں ”شیبانی سوسائٹی“ قائم ہوئی ہے جس میں امام محمد ابن حسن کے فقہی مسائل سے فائدہ اٹھایا جا رہا ہے، ان کی کتابوں کے ترجمے کئے جا رہے ہیں۔ فقیر عبد القدیر اور پروفیسر الیاس برنی اُس سوسائٹی کے رکن ہیں۔ امریکہ والوں نے بھی اپنی پناہ کے لئے ایک لاکھ قرآن شریف طبع کر کے شائع کیا ہے۔ ان کے خیال میں بھی قرآن ہی شمعِ ہدایت ہو سکتا ہے۔

ڈاکٹر لطیف صاحب نے حدیث کی کتابوں کی نظرثانی کرنے کی تحریک کی۔ اس کے متعلق مختلف مقام کے مسلمانوں نے جو کچھ لکھا اُس سے یہی ثابت ہو رہا ہے کہ بہت سے مسلمانوں پر جہالت کا آسیب آ گیا ہے۔ ایک صاحب نے بڑی بلند پروازی کی اور قرآن و احادیث کے انکار کرنے میں کوئی دقیقہ اٹھا نہیں رکھا۔ صاحبو! تاویلِ بے جا کو، بے معنی باتیں بنانے کو میں انکار کے قریب قریب سمجھتا ہوں۔ صاحبِ مذکور کے خیالات طبع بیشک ہوئے مگر لگے معذرت کرنے کہ میں مسلمان ہوں، میں قرآن و حدیث سے

انکار نہیں کرتا، اور لگے بغلیں جھانکنے۔ میں کہتا ہوں اتنا کہنا بھی دلالت کرتا ہے کہ ہے کچھ دل میں ایمان۔ غرضیکہ اسلامی حکومت ہونے کا دار و مدار اسلامی اقتدارِ اعلیٰ اور قرآن و حدیث کے ماننے پر موقوف ہے۔ میں یہ نہیں کہہ رہا ہوں کہ آنکھیں بند کر کے رطب و یابس تر و خشک سب کو مان لو۔ ﴿إِذَا جَاءَكُمْ فَاسِقٌ بِنَبَإٍ فَتَبَيَّنُوا﴾ پر عمل کرو۔ قرآن و حدیثِ متواتر کا خلاف تو ممکن نہیں، خبرِ آحاد پر غور کرو۔ خدا نے تمھیں عقل دی ہے اس کی ناقدری نہ کرو، اس سے بھی کام لو۔ حدیث سے انکار مت کرو، کسی راوی کو نہیں مانتے وہ اس قدر برا نہیں جتنا کہ قرآن اور حدیثِ متواتر سے انکار ہے۔

صاحبو! ابتدائے خلافت میں لوگ کم تھے، جمع کرنا ہوتا تو ایک شخص ”الصلوٰۃ جامعۃ“ پکار کر کہہ دیتا اور سب لوگ جمع ہو جاتے۔ بڑے لوگ تھے، صاحبِ رائے تھے، سب سے مشورہ لیا جاتا۔ بعض دفعہ ذیلی مجلس یا سب کمیٹی کے سپرد انتخاب کر دیا جاتا۔ حضرت عمر جب زخمی ہوئے تو عشرۂ مبشرہ میں سے چھ صاحبوں کی ایک ذیلی کمیٹی بنا دی اور تمام مسلمانوں کو حکم دیدیا کہ جب تک یہ تصفیہ نہ کریں، خلیفہ کو منتخب نہ کریں، اس وقت تک ان کو اپنی جگہ سے منتشر ہونے نہ دو، اور حضرت عثمان کا انتخاب ہو گیا۔ بعض دفعہ حضرت عمر ہرمزان وغیرہ مجوسیوں سے بھی مشورہ لیتے، جب مسلمان زیادہ ہو گئے تو ہر زمانہ کا خلیفہ یا بادشاہ ماہرانِ فن کو جمع کرتا اور ان کی مجلس سے مقدمات کا فیصلہ ہوتا۔ یورپ میں

سب لوگ تعلیم یافتہ ہیں اور صاحبِ مال و دولت ہیں، ان کی ذاتی غرض سوائے ملک کی بہبودی کے کوئی پیشِ نظر نہیں ہے، وہ عامۃ الناس سے مشورہ لیتے ہیں۔ یہاں تعلیم کی بڑی کمی ہے۔ ہم لوگوں کو یورپ کے لوگوں پر قیاس کرنا قیاس مع الفارق ہے۔ ہمارے زمانے میں ایک الیکشن یا سلیکشن ہوا۔ میرا بچہ ایف اے میں تھا مگر اس کی عمر بیس یا بائیس سے کم تھی، وہ انتخاب کی کمیٹی میں شریک نہیں ہو سکا۔ ہمارے گھر کی ماما معمر تھی، اس کو رائے دینے اور انتخاب کرنے کا موقع ملا۔ غور کیجئے کہ ایک جاہل عورت کس طرح سے اہل الرائے کے انتخاب کرنے میں حصہ لے سکتی ہے؟ مجھے معلوم ہے لوگوں کو ڈنر اور دعوتیں دے کر، کھانے کھلا کر لوگوں کی رائے خریدی جاتی ہے۔ یہ خریدی ہوئی رائیں حکومت کے کیا کام آسکتی ہیں؟ کوا چلا ہنس کی چال، اپنی چال بھی بھول گیا۔

کلاغے تکے کبک را جوش کرد تکے خویشتن هم فراموش کرد

یہ آراء کو خریدنے والے، روپیہ صرف کرنے والے جب برسرِ حکومت آتے ہیں تو بالائی پر ان کا کام چلتا ہے۔ انہیں معلوم نہیں کہ اس بالائی میں قوم کی تباہی کا خون بھی ہے۔ یہ لوگ چند روز میں اپنے صرفہ کا تدارک کر لیتے ہیں۔ یا تو مفلس تھے، لکھ پتی ہو جاتے ہیں۔ میں ایک کو روؤں دو کو روؤں کن کن کو روؤں آوے کا آوا بگڑ گیا ہے۔

صاحبو! اسلام ایک مکمل دین ہے اس میں نئی چیز کی بہت کم ضرورت ہے۔ میرے خیال میں تو صرف عملِ صالح کی ضرورت ہے۔ اچھے بنو، اچھا نمونہ بنو، خیانت چھوڑو، جھوٹ چھوڑو، دختِ رز کو منہ نہ لگاؤ، غلط طور سے کسی سے محبت نہ کرو (زنا کاری نہ کرو)، اچھے کام کرو گے، دیانت سے کام کرو گے، سرکاری فرائض ادا کرو گے تو نہ صرف اپنے بلکہ پرایوں کے دل میں بھی تمھاری وقعت پیدا ہو گی۔ اچھا کام کرنے والے کو سب دوست رکھتے ہیں۔ نوکری نہ ملنے کی شکایت کیا کر رہے ہو؟ تم اپنے کام سے ثابت کرو کہ تم اچھے سے اچھا کام کر سکتے ہو، لائقِ اعتبار ہو، دشمن دوست بن جائیں گے، غیر اپنے ہو جائیں گے۔

صاحبو! اتفاق پیدا کرو، مضبوط رسّا بنو، ایک ایک تار کو بچہ بھی توڑ سکتا ہے، مگر رسّے کو کوئی نہیں توڑ سکتا۔ سنو قرآن کیا کہتا ہے:

آیت [سورۃ آل عمران 3:103]
وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا

[پ آل عمران ع ۱۱] (تم سب مل کر اللہ کی رسی کو مضبوط پکڑو اور فرقہ بندی میں مبتلا نہ ہو)۔ صاحبو! یہ کیا حال ہے، قادیانیوں کی مسجد الگ، اسماعیلیوں کی الگ، دیوبندیوں کی الگ، اہل سنت و الجماعت کی الگ۔ قرآن میں تو ہے:

آیت [سورۃ البقرة 2:114]
وَمَنْ أَظْلَمُ مِمَّنْ مَّنَعَ مَسَاجِدَ اللَّهِ أَنْ يُذْكَرَ فِيهَا اسْمُهُ وَسَعَىٰ فِي خَرَابِهَا

[پ بقرہ ع ۱۴] (اور اس سے بڑھ کر کون ظالم ہے جس نے اللہ کی مسجدوں میں اس کی یاد کرنے سے روکا اور ان کو غیر آباد کرنے میں سعی کی)۔ الگ الگ مسجدوں میں نماز پڑھنا، دوسروں کو اپنی مسجد میں آنے نہ دینا کیا اس آیت

کا مصداق نہیں ہے؟ کیا یہ «وَسَعَىٰ فِي خَرَابِهَا» نہیں ہے؟ ع:

بہ گفتہ گفتہ من شدم بسیار گو

کیا ہم سب میں «لَا إِلٰهَ إِلَّا اللهُ مُحَمَّدٌ رَّسُولُ اللهِ» مشترک نہیں ہے؟ اس مشترک کلمہ کے پڑھنے میں اور مل کر پڑھنے میں یہ پھوٹ کاہے کو ہے؟

یہ رشتہ خدائی ہے کیا خوب رشتہ مسلمان آپس میں ہیں بھائی بھائی

ع: ﴿إِنَّمَا الْمُؤْمِنُونَ إِخْوَةٌ﴾۔ بے دینی کے چوہے تمھارے کپڑوں کو کھا جا رہے ہیں۔ اب تمھارے پتلون، پاجامے اور نیکر میں سوراخ ہو رہے ہیں، تمھاری گنتی ننگوں میں ہو جائے گی تو شریف آدمی کے سامنے جانے کے قابل نہ رہو گے۔ صاحبو! آج کل بہت سے مسلمانوں میں ”طاعون العقول“ (عقل کا مرض) پھیل گیا ہے۔ وہ کہتے ہیں کہ اسلامی سزائیں انسانیت کے خلاف ہیں۔ قصاص میں قتل اور چور کو شرعی سزا دینا دونوں تہذیب اور عقل کے خلاف ہیں۔ مگر طالب علم اگر اپنے حقوق کا مطالبہ کریں تو ان پر گولی چلا دینا عین انصاف ہے؟ مخالفین پر بمباری کرنا، ایٹم بم، ہائیڈروجن بم پھینک کر عورتوں، بچوں اور بوڑھوں کو بھی ہلاک کرنا مقتضائے عقل ہے؟ انہیں معلوم نہیں کہ حدود و قصاص میں اگر شبہ ہو تو وہ ساقط ہو جاتے ہیں۔ ہمارے زمانے میں جب کہ حیدرآباد میں قصاص ہوتا تھا قاتل نے مقتول کی بیوی کے پیروں پر سر رکھ دیا۔ اس نے فوراً معاف کر دیا

شرعی طور پر دس وارثوں میں سے ایک نے بھی اگر معاف کر دیا تو قصاص نہیں ہو سکتا، ان کو دیت (خوں بہا) دلا دی جائیگی، چلو چھٹے۔ میں پوچھتا ہوں سزا کیوں دی جاتی ہے؟ جرائم کے بند کرنے کے لئے۔ آنکھوں پر سے پردہ، کانوں میں سے روئی نکالو، دریافت کرو جہاں شرعی سزائیں دی جاتی ہیں وہاں جرائم بند ہیں یا اس کے خلاف؟ صاحبو! ایک شخص پر چوری کا الزام لگایا گیا۔ مستغاث علیہ یعنی مجرم کہتا ہے: میں نے اس چیز کو ان سے خریدا ہے، انہوں نے پیسے لے لئے اور مجھے چیز نہ دی اور میں نے ان سے اپنی چیز چھین لی۔ دیکھو، فوجداری مقدمہ (Criminal case) دیوانی (Civil case) ہو گیا۔ بہرحال شبہ پر حدود ساقط ہو جاتے ہیں۔ جہاں شرعی سزائیں نہیں دی جاتیں وہاں صبح سے شام تک جرائم کی گرم بازاری ہے۔

بر ایں عقل و دانش بباید گریست

صاحبو! اسلامی بادشاہوں میں بعض بادشاہ ظالم بھی تھے مگر ان میں خودسر، بے راہ، خود مختار اور ڈکٹیٹر کوئی نہیں ہوا، کیوں کر ہوتا؟ قرآن و حدیث اس کی گردن دباتے۔ مگر اس کے ساتھ ہی بادشاہ میں ﴿وَزَادَهُ بَسْطَةً فِي الْعِلْمِ وَالْجِسْمِ﴾ [پ بقرہ ع ۳۲] (اور اللہ نے اس کو علم اور جسمانی قوت میں بھی فوقیت دی ہے) کی حقیقت بھی ضروری ہے۔ علم و فہم بھی رکھے اور دشمن کی مدافعت کرنے کے لئے قوت بھی رکھے۔ پیغمبر کے رہتے ہوئے بھی (قومِ بنی اسرائیل) لوگ پیغمبر سے التجا کرتے ہیں:

آیت [سورۃ البقرة 2:246]
ابْعَثْ لَنَا مَلِكًا نُّقَاتِلْ فِي سَبِيلِ اللَّهِ

[پ بقرہ ع ۳۲] (ہمارے لئے ایک بادشاہ مقرر کر دیجئے)۔ بزرگی الگ چیز ہے اور حکومت کرنے کی صلاحیت الگ چیز، یہ دونوں باتیں بے شک خلفائے اربعہ میں تھیں۔ اس وجہ سے وہ جانشینِ پیغمبر سمجھے جاتے تھے۔ مختلف اوقات میں اچھے بادشاہ بھی ہوئے ہیں جیسے عمر بن عبد العزیز، ہارون الرشید شاگردِ امام مالک۔ ع: ہر یکے را بہر کارے ساختند۔ برہمن اپنی ذات کو دوسروں کی ذاتوں سے اعلیٰ سمجھتے ہیں، مگر حکومت ملتی ہے تو چھتری خاندان کے لوگوں کو۔ رام چندر جی، کرشن جی نیک بھی تھے اور حکومت کرنے کی صلاحیت بھی رکھتے تھے، اس لئے انہیں حکومت ملی تھی۔

اسلام میں سید، شیخ، مغل، پٹھان کا جھگڑا نہیں ہے۔ ہر خاندان میں حکومت رہ چکی ہے۔ سیدوں میں بھی، شیخوں میں بھی، پٹھانوں اور مغلوں میں بھی، بلکہ غلام بھی جوہرِ ذاتی اور قابلیت کی بناء پر بادشاہ ہو گئے۔ ذات و جماعت کا جھگڑا اسلامی اصول کے خلاف ہے۔ سب سے پہلے ذات کا جھگڑا استاد الملائکہ نے نکالا اور ﴿خَلَقْتَنِي مِنْ نَّارٍ وَخَلَقْتَهُ مِنْ طِينٍ﴾ [پ ۸ ع ۶] کہا۔ شیطان آدم کو کیا سمجھا؟ خاک سمجھا! آدم میں جامعیت تھی، ہر قسم کی صلاحیت تھی، وہ خلیفہ ہو کر رہا۔ اب تک بھی آدمی ہی ساری دنیا پر حکومت کرتے ہیں، شانِ خلافت دکھاتے ہیں۔ انسان شیطان کو ایک شیشہ میں بند کر دیتا ہے، شیطان عاجز ہو کر

﴿إِلَّا عِبَادَكَ مِنْهُمُ الْمُخْلَصِينَ﴾ کا اعتراف کرتا ہے۔ وہ کیا اور اس کا اعتراف کیا! ذو الجلال و الاکرام فرماتا ہے: ﴿إِنَّ عِبَادِي لَيْسَ لَكَ عَلَيْهِمْ سُلْطَانٌ﴾، فرماتا ہے: آدمی بنو! حق بولو! اللہ کے حکموں پر چلو! ﴿أَنَّ الْأَرْضَ يَرِثُهَا عِبَادِيَ الصَّالِحُونَ﴾ کے مصداق بنو، پھر دنیا بھی تمھاری ہے اور آخرت بھی تمھاری۔

مجتہد کے کتنے اقسام اور درجات ہیں؟ اول: ”مجتہدِ مطلق“، صاحبِ اصول، اس کا طریقِ استنباط و استدلال جدا ہوتا ہے، جیسے حضرت امامِ اعظم ابو حنیفہ رحمۃ اللہ علیہ۔ دوم: ”مجتہد فی المذہب“، اس کے اصولِ استنباط وہی ہوتے ہیں جو اس کے شیخ کے ہوتے ہیں، دیگر مسائل میں وہ اپنے شیخ کا خلاف بھی کرتا ہے۔ عام طور سے لوگ شاگردانِ امام کو مجتہد فی المذہب سمجھتے ہیں، مگر علمِ اصولِ فقہ سے واقف شخص جانتا ہے کہ صاحبین خصوصاً اصولی اختلاف بھی رکھتے ہیں، مگر یہ کم ہے، اکثر اصول میں امام کے موافق ہیں۔ سوم: ”مجتہد فی المسائل“، کسی خاص مسئلہ میں صاحبِ تحقیق، یا اگر کوئی نیا واقعہ پیدا ہو تو حکم کا استنباط کرتا ہے، ہاں مسئلہ کا کیا جواب دیتا ہے۔ چہارم: ”صاحبِ ترجیح“، مجتہدینِ سابق کے مختلف اقوال میں سے کسی ایک کو ترجیح دیتا ہے۔ مجتہد فی المسائل کا ہر زمانہ میں رہنا ضروری ہے ورنہ دین کے کام بند ہو جائیں گے۔

سب کے آخر میں مفتی کا درجہ ہوتا ہے، اجتہاد نہیں کر سکتا، کتابیں الٹ پلٹ کر کسی نہ کسی کا قول نکال دیتا ہے۔ عام طور سے علماء ایسے ہی پائے جاتے ہیں۔ بہرحال مجتہد کے لئے ادب، نحو، صرف، قرآن، تفسیر، حدیث و فقہ، پھر حدیث کے لئے اسماء الرجال اور سیرتِ نبوی، تاریخ، اصولِ حدیث، اصولِ فقہ، ان سب کے لئے محاورات، ماحول کے اثرات اور احکامِ دین کی تطبیق سے واقف ہونا ضروری ہے۔ ایک آدھ حدیث کی مترجم کتاب دیکھ لی، نہ راویوں کے حال سے واقف، نہ ناسخ و منسوخ احکام معلوم، نہ تطبیق و استنباط کی قوت حاصل، اور لگے خود کو مجتہد سمجھنے، عالموں پر اعتراضات کی بوچھار کرنے! یاد رکھو! خدا کو جواب دینا ہے۔ ﴿فَاسْأَلُوا أَهْلَ الذِّكْرِ﴾ پر عمل کر کے ٹھنڈے دل بیٹھ رہنا موجبِ امن ہے۔

آیت [سورۃ آل عمران 3:118]
يَا أَيُّهَا الَّذِينَ آمَنُوا لَا تَتَّخِذُوا بِطَانَةً مِنْ دُونِكُمْ لَا يَأْلُونَكُمْ خَبَالًا وَدُّوا مَا عَنِتُّمْ قَدْ بَدَتِ الْبَغْضَاءُ مِنْ أَفْوَاهِهِمْ وَمَا تُخْفِي صُدُورُهُمْ أَكْبَرُ قَدْ بَيَّنَّا لَكُمُ الْآيَاتِ إِنْ كُنْتُمْ تَعْقِلُونَ

(اے ایمان والو! کسی کو اپنا رازدار نہ بناؤ اپنوں کو چھوڑ کر، یہ لوگ تمھاری تباہی میں کوتاہی نہ کریں گے۔ ان کی دلی خواہش ہے کہ تم کو تکلیف پہونچے۔ دشمنی تو ان کی باتوں سے ظاہر ہو ہی چکی ہے، کینہ اور کپٹ جو سینوں اور دلوں میں چھپا رکھا ہے وہ تو اس سے بھی بڑھ کر ہے۔ ہم نے تو ساری نشانیاں بتا دیں اگر تم کچھ بھی عقل رکھتے ہو)۔

آیت [سورۃ آل عمران 3:119-120]
هَا أَنْتُمْ أُولَاءِ تُحِبُّونَهُمْ وَلَا يُحِبُّونَكُمْ وَتُؤْمِنُونَ بِالْكِتَابِ كُلِّهِ وَإِذَا لَقُوكُمْ قَالُوا آمَنَّا وَإِذَا خَلَوْا عَضُّوا عَلَيْكُمُ الْأَنَامِلَ مِنَ الْغَيْظِ قُلْ مُوتُوا بِغَيْظِكُمْ إِنَّ اللَّهَ عَلِيمٌ بِذَاتِ الصُّدُورِ ۝ إِنْ تَمْسَسْكُمْ حَسَنَةٌ تَسُؤْهُمْ وَإِنْ تُصِبْكُمْ سَيِّئَةٌ يَفْرَحُوا بِهَا وَإِنْ تَصْبِرُوا وَتَتَّقُوا لَا يَضُرُّكُمْ كَيْدُهُمْ شَيْئًا إِنَّ اللَّهَ بِمَا يَعْمَلُونَ مُحِيطٌ ۝

(ہاں تم تو کچھ ایسے سادہ دل ہو کہ ان سے دوستی رکھتے ہو اور وہ تم سے کچھ بھی دوستی نہیں رکھتے اور تم اللہ کی ساری کتابوں پر ایمان رکھتے ہو اور وہ قرآن کے منکر ہیں، اور جب تم سے ملتے ہیں تو کہہ دیتے ہیں کہ ہم بھی ایمان لے آئے ہیں اور جب خلوت میں اور اکیلے ہوتے ہیں تو مارے غصے کے اپنی انگلیاں کاٹتے ہیں۔ یا محمد! ان سے کہو کہ اپنے غصے میں جل جل مرو۔ اللہ کو خوب معلوم ہے جو تمھارے سینوں میں ہے۔ [ج ۴ آل عمران ع ۱۲] اگر تم کو کچھ بھلائی ملے تو ان کو برا معلوم ہوتا ہے اور اگر تم کو کوئی برائی پہنچے تو اس سے وہ خوش ہوں اور اگر تم صبر کرو اور بچتے رہو تو ان کے فریب سے تمھارا کچھ نہ بگڑے گا بیشک وہ جو کچھ کرتے ہیں سب اللہ کے بس میں ہے)۔

نسأل الله العفو والعافية في الدنيا والآخرة۔

پرنٹر اور اشاعتی تفصیلات

پرنٹر: اعجاز پرنٹنگ پریس، پریس لین، چھتہ بازار، حیدرآباد (اے پی)۔

ملنے کے پتے

(۱) مکتبہ نشاۃ ثانیہ — معظم جاہی مارکٹ، حیدرآباد دکن نمبر (۱)۔
(۲) اسٹوڈنٹس بک ڈپو — چارکمان، حیدرآباد نمبر (۲)۔
(۳) اسلامک بک سنٹر — متصل مسجد چوک، حیدرآباد نمبر (۲)۔
(۴) حافظ محمد ولی اللہ صاحب کتب فروش — عقب مسجد چوک، حیدرآباد نمبر (۲)۔
(۵) حسرت بک ایجنسی — خان عزیز ترابی، قاضی پورہ، حیدرآباد دکن نمبر (۲)۔